Jaswant Singh Kanwal

ਆਤਮਘਾਤ ਕਰਨ ਵਾਲੇ ਕਿਸਾਨ ਭਰਾਵੋ! ਬੀਰ ਬਹਾਦਰ ਪੁਰਖਿਆਂ ਦੀ ਤਾਰੀਖ਼ ਤੁਹਾਨੂੰ ਵੰਗਾਰਦੀ ਹੈ: ਆਪਣੇ ਕਿਸਾਨੀ ਸੰਦਾਂ ਨਾਲ ਮੁਕਤੀ ਮਾਰਗ ਵਾਲੇ ਹਥਿਆਰ ਵੀ ਰਾਖੀ ਵਜੋਂ ਸੰਭਾਲੋ। ਹੱਕ-ਹਲਾਲ ਦੀ ਦਿਨ ਰਾਤ ਕਮਾਈ ਕਰਨ ਵਾਲਾ ਕਾਮਾ ਕਿਸਾਨ ਭੁੱਖਾ ਮਰੇ, ਇਸ ਆਜ਼ਾਦੀ ਨੂੰ ਲਾਹਨਤ ਨਹੀਂ? ਆਜ਼ਾਦੀ ਤਾਂ ਸਭਨਾਂ ਲਈ ਸੁਖਦਾਤੀ ਹੁੰਦੀ ਐ। ਫਿਰ ਕਾਮਿਆਂ ਕਿਸਾਨਾਂ ਦਾ ਸੁਖ ਕੀਹਨੇ ਚੁਰਾ ਲਿਆ? ਤਾਰੀਖ਼ੀ ਸੱਚ ਇਹ ਹੈ, ਹੇਰਾ ਫੇਰੀਆਂ ਨਾਲ ਚੁਸਤ ਬੇਈਮਾਨਾਂ ਤੇ ਗ਼ਦਾਰਾਂ ਹਕੂਮਤ ਹੱਥਿਆ ਲਈ ਹੈ। ਸਾਡੇ ਮਹਾਨ ਪੁਰਖਿਆਂ ਹੱਕੀ ਨਾਅਰਾ ਲਾਇਆ ਸੀ: ‘‘ਪਗੜੀ ਸੰਭਾਲ ਜੱਟਾ’’। ਉਸ ਨਾਅਰੇ ਬਿਨਾਂ ਹੁਣ ਫਿਰ ਗੁਜ਼ਾਰਾ ਨਹੀਂ। ਬਹਾਦਰੋ!  ਰਲੋ ਤੇ ਜੁੜੋ, ਇਸ ਕੰਗਾਲੀ ਤੇ ਨਖਿਧ ਗੁਲਾਮੀ ਨੂੰ ਇਕ ਇਨਕਲਾਬੀ ਧੱਕਾ ਹੋਰ ਦਿਓ। ਹੋਰ ਕੋਈ ਚਾਰਾ ਨਹੀਂ। ਜੇ ਮੋਰਚਾ ਛੱਡ ਕੇ ਭੱਜੋਗੇ; ਜ਼ਮਾਨੇ ਦੇ ਗੀਦੀ ਬਣੋਗੇ ਤੇ ਤੁਹਾਨੂੰ ਬੀਰ ਬਹਾਦਰਾਂ ਤੇ ਸੂਰਮੇ ਸ਼ਹੀਦ ਪੁਰਖਿਆਂ ਦੇ ਜਾਏ ਕਿਸੇ ਨਹੀਂ ਕਹਿਣਾ। ਸੋ ਇੱਜ਼ਤ, ਅਣਖ ਤੇ ਪੱਗ ਦੀ ਲਾਜ ਸੰਭਾਲੋ; ਭਾਵੇਂ ਕਿਵੇਂ ਸੰਭਾਲੋ।