Punjabio ! Jeena Hai Ke Marna

ਪੰਜਾਬ ਅੱਜ ਆਪਣੇ ਕੌਮੀ ਪੱਖਾਂ ਵੱਲੋਂ ਖੋਹਿਆ ਜਾ ਰਿਹਾ ਹੈ: ਮੈਂ ਇਸ ਨੂੰ ਸਬੂਤਾ ਰੱਖਣ ਲਈ ਆਪਣੇ ਪੰਜਾਬੀ ਭਰਾਵਾਂ ਅੱਗੇ ਹਾਅ ਦਾ ਨਾਅਰਾ ਮਾਰ ਰਿਹਾ ਆਂ। ਪੰਜਾਬ ਖੇਤੀ ਬਾੜੀ ਦੀ ਸਖਤ ਮਿਹਨਤ ਕਰਦਾ  ਅਤੇ ਬਾਹਰਲੇ ਹਮਲਾਵਰਾਂ ਨਾਲ ਲੜਦਾ, ਕੌਮੀ ਤੇ ਰਾਜਕੀ ਪੱਖਾਂ ਵਲੋਂ ਅਵੇਸਲਾ ਰਿਹਾ ਹੈ। ਗੁਰੂ ਦੀ ਰਜ਼ਾ ਵਿਚ ਵੰਡ ਖਾਣ ਵਾਲੇ ਕਿਰਤੀ ਦੇ ਚਲਣ ਵਿਚ ਵਿਚਰਦਾ ਰਿਹਾ ਹੈ। ਜਿਹਨਾਂ ਨੂੰ ਪਾਲਦਾ ਤੇ ਜਿਹਨਾਂ ਦੀ ਰਾਖੀ ਲਈ ਸ਼ਹੀਦ ਤੱਕ ਹੁੰਦਾ ਰਿਹਾ; ਅੱਜ ਉਹਨਾਂ ਹੀ ਭਲੇ ਲੋਕਾਂ ਵਿਚ ਬੁਰੀ ਤਰ੍ਹਾਂ ਫਸਿਆ, ਥਾਂ ਥਾਂ ਵਿਖਰਿਆ, ਬਲੋਂ ਹਾਰਿਆ ਤੇ ਨਸ਼ਿਆਂ ਮਾਰਿਆ ਦਮ ਦਮ ਖਾਤਮੇ ਵਲ ਵਧ ਰਿਹਾ ਹੈ। ਮੈਂ ਜਸਵੰਤ ਸਿੰਘ ਕੰਵਲ, ਆਪਣੇ ਗੁਰੂ ਦੀ ਸੁਗੰਧ ਚੁੱਕ ਕੇ ਸੱਚ ਤੇ ਹਕੀਕਤ ਬਿਆਨ ਕਰਦਾ , ਥਾਂ ਪਰ ਥਾਂ ਖਿਲਰੇ ਪੰਜਾਬੀਆਂ ਨੂੰ ਮੋਢਿਆਂ ਤੋਂ ਫੜ ਫੜ ਹਲੂਣ ਰਿਹਾ ਆਂ ਪਿਆਰਿਓ। ਪੁਰਖਿਆਂ ਦਾ ਪੰਜਾਬ ਜਿਉਂਦਾ ਰਖਣਾ ਹੈ ਜਾਂ ਗਰੀਬੀ, ਤੰਗਦਸਤੀ ਤੇ ਆਪਣੀ ਬੇਪ੍ਰਵਾਹੀ ਵਿਚ ਖੋਰ ਦੇਣਾ ਹੈ। ਆਲਸ ਵਿਚ ਸੁੱਤੇ ਰਹੇ ਤਾਂ ਮਿਠੜੀ ਬੋਲੀ, ਕੁਰਬਾਨੀਆਂ ਭਰਿਆ ਇਤਿਹਾਸ, ਖੰਡ ਖੀਰ ਸਭਿਆਚਾਰ ਅਤੇ ਸਰਬਤ ਦੇ ਭਲੇ ਦਾ ਗੁਰੂ ਧਰਮ ਸਭ ਕੁਝ ਹੀ ਕੌਮੀ ਵਿਰਸੇ ਵਜੋਂ ਰੁੜ੍ਹ ਜਾਣਾ ਹੈ? ਕੱਟਾਂ ਵੱੱਢਾਂ ਤੋਂ ਬਚਿਆ ਪੰਜਾਬ, ਬੇਗਾਨੇ ਰੰਗਾਂ, ਆਬਾਦੀਆਂ ਤੇ ਰਾਜਸੀ ਧੱਕਿਆਂ ਨਾਲ ਆਪਣੀਆਂ ਬੁਨਿਆਦਾਂ ਤੋਂ ਹਲਾ ਦਿੱਤਾ ਗਿਆ ਹੈ।